( غیــر مطبــوعــہ )
ہَوا کے لمس کو برگِ خـزاں پکارے گا
تجھے اے برق مرا آشیاں پکارے گا
اگر خموش رہے طائرانِ کُنجِ قفس
تو پھر یہ قہقہۂ جسم و جاں پکارے گا
میں اس خیال سے شہرِ جنوں میں آ نکلا
یہیں سے اب ســفَـرِ رایگاں پکارے گا
حصارِ آئنہ ! تجھ سے بہت ہی دُور ہوں میں
یہ میرا عکس مجھے اب کہاں پکارے گا
تھکن سے چُــور مظفّـرؔ ہے نا خدا کا بدن
کسی جــزیرے کو اب بادباں پکارے گا
( مظفّـر احمــد مظفّــرؔ )
