کبھی آنکھوں پہ، کبھی سر پہ بٹھائے رکھنا
زندگی تلخ سہی، دل سے لگائے رکھنا
زندگی تلخ سہی، دل سے لگائے رکھنا
لفظ تو لفظ ہیں، کاغذ سے بھی خوشبو پھوٹے
صفحۂ وقت پہ وہ پھول کھلائے رکھنا
چاند کیا چیز ہے؟ سورج بھی ابھر آئے گا
ظلمتِ شب میں لہو دل کا جلائے رکھنا
حرمتِ حرف پہ الزام نہ آنے پائے!
سخنِ حق کو سرِ دار سجائے رکھنا
فرش تو فرش، فلک پر بھی سنائی دے گا
مری آواز میں آواز ملائے رکھنا
بخشؔ سیکھا ہے شہیدانِ وفا سے ہم نے
ہاتھ کٹ جائیں، علَم منہ سے اٹھائے رکھنا
(بخشؔ لائلپوری)
انتخاب :-: ابوالحسن علی ندوی
