نہ کہیں سے دور ہیں منزلیں نہ کوئی قریب کی بات ہے ج…

نہ کہیں سے دور ہیں منزلیں نہ کوئی قریب کی بات ہے
جسے چاہیں اس کو نواز دیں یہ درِحبیبﷺ کی بات ہے
….
منورؔ بدایونی کی برسی ہے۔
۔۔۔۔۔۔۔۔۔۔۔
اردو کے ممتاز شاعر حضرت منور بدایونی کا اصل نام ثقلین احمد تھا۔ وہ 2 دسمبر1908ء کو بدایوں میں پیدا ہوئے تھے۔ ان کے شعری مجموعوں میں منور نعتیں، منور غزلیں، منور نغمات اور منور قطعات کے نام شامل ہیں۔ اس کے علاوہ ان کے نعتیہ کلام کی کلیات بھی اشاعت پذیر ہوچکی ہے۔ منور بدایونی کے چھوٹے بھائی محشر بدایونی بھی اردو کے ممتاز شاعروں میں شمار ہوتے ہیں۔ 6 اپریل 1984ء کو منور بدایونی کراچی میں وفات پاگئے ۔
۔۔۔۔۔۔۔۔۔۔۔۔۔۔
منتخب اشعار
۔۔۔۔۔۔۔۔۔۔۔۔۔۔۔۔
دعا ہو اثر کچھ نہ ہو، یہ نہیں ممکن
اثر دعا کیلئے ہے دعا اثر کے لئے
۔۔۔۔۔۔۔۔۔۔۔۔۔
منور میں نے جب دل پر نظر کی
منور اک چراغِ طور دیکھا
۔۔۔۔۔۔۔۔۔۔۔۔۔۔
پیچھے مڑ مڑ کر نہ دیکھو اے منورؔ بڑھ چلو
شہر میں احباب تو کم ہیں سگے بھائی بہت
۔۔۔۔۔۔۔۔۔۔۔۔۔۔
علاج کی نہیں حاجت دل و جگر کے لیے
بس اک نظر تری کافی ہے عمر بھر کے لیے
۔۔۔۔۔۔۔۔۔۔۔۔۔۔
جو دل کو دے گئی اک درد عمر بھر کے لیے
تڑپ رہا ہوں ابھی تک میں اس نظر کے لیے
۔۔۔۔۔۔۔۔۔۔۔۔۔۔
نظر آتی ہیں سوئے آسماں کبھی بجلیاں کبھی آندھیاں
کہیں جل نہ جائے یہ آشیاں کہیں اڑ نہ جائیں یہ چار پر
۔۔۔۔۔۔۔۔۔۔۔۔
اب کنج لحد میں ہوں میسر نہیں آنسو
آیا ہے شب ہجر کا رونا مرے آگے
۔۔۔۔۔۔۔۔۔۔۔۔
تیرا وعدہ نہیں تو تو کیا ہے
آدمی کیا وہ جسکی بات نہیں
۔۔۔۔۔۔۔۔۔۔۔
دل میں لہو کی بوندیں کچہ جان بن گئی ہیں
آنکہوں سے جو بہی ہیں طوفان بن گئی ہیں
کافر تری نگاہیں تیری ہیں یا میری ہیں
جو مری زندگی کا سامان بن گئی ہیں
مخلوط ہو کے جلوے شکلوں میں آ گئے ہیں
رنگینیاں سمٹ کر انسان بن گئی ہیں
….
نہ کہیں سے دور ہیں منزلیں نہ کوئی قریب کی بات ہے
جسے چاہیں اس کو نواز دیں یہ درِحبیبﷺ کی بات ہے

جسے چاہا در پہ بلالیا ، جسے چاہا اپنا بنا لیا
یہ بڑے کرم کے ہیں فیصلے ، یہ بڑے نصیب کی بات ہے

وہ خدا نہیں ، بخدا نہیں، مگر وہ خدا سے جدا نہیں
وہ ہیں کیا مگر وہ کیا نہیں یہ محب حبیبﷺ کی بات ہے

ترے حسن سے تری شان تک ہے نگاہ و عقل کا فاصلہ
یہ ذرا بعید کا ذکرہے وہ ذرا قریب کی بات ہے

وہ مچل کے راہ میں رہ گئی ، یہ تڑپ کے در سے لپٹ گئی
وہ کسی امیر کی آہ تھی، یہ کسی غریب کی بات ہے

تجھے اے منور بے نوا در شاہ سے چاہیے اور کیا
جو نصیب ہو کبھی سامنا تو بڑے نصیب کی بات ہے
…………………..