کسی غم گسار کی محنتوں کا یہ خوب میں نے صلہ دیا کہ…

کسی غم گسار کی محنتوں کا یہ خوب میں نے صلہ دیا
کہ جو میرے غم میں گھلا کیا اُسے میں نے دل سے بھلا دیا

جو جمالِ روُئے حیات تھا ، جو دلیلِ راہِ نجات تھا
اُسی راہبر کے نقوُشِ پا کو مسافروں نے مِٹا دیا

تِرے حُسنِ خلق کی اِک رمق مری زندگی میں نہ مل سکی
میں اسی میں خوش ہوں کہ شہر کے دَر و بام کو تو سجا دیا

میں ترے مزار کی جالیوں ہی کی مدحتوں میں مگن رہا
ترے دشمنوں نے ترے چمن میں خزاں کا جال بِچھا دیا

یہ مری عقیدتِ بے بصر ، یہ مری ارادتِ بے ثمر
مُجھے میرے دعویِٰ عِشق نے ،نہ صنم دیا نہ خُدا دیا

ترا نقشِ پا تھا جو رہنما ، تو غبارِ راہ تھی کہکشاں
اسے کھو دیا تو زمانے بھر نے ہمیں نظر سے گِرا دیا

مرے رہنما ترا شکریہ کروں کس زُباں سے بھلا ادا
مری زندگی کی اندھیری شب میں چراغِ فکر جلا دیا

کبھی اے عنایتِ کم نظر ترے دل میں یہ بھی کسک ہوئی
جو تبسمِ رخِ زیست تھا اُسے تیرے غم نے رلا دیا

پروفیسر عنایت علی خان

اِنتِخاب
سفیدپوش