کوئی گلاب نہیں’ کوئی رنگ و بُو بھی نہیں
یہی سبب ہے کہ تُو میرے رُو بَہ رُو بھی نہیں
کہاں وہ دن کہ مُیسر تھا تُو ہی تُو مُجھ کو
اور اَب یہ دن کہ مِری تُجھ سے گفُت گُو بھی نہیں
جلا ہُوں اتِنا مِری جاں ! تِری مَحبّت میں
کہ میرے جسم میں باقی مِرا لہو بھی نہیں
عجیب سی مِری حالت ہے آج کل مِرے دوست !
مِرے وجود کی آواز کُو بَہ کُو بھی نہیں
کئی دنوں سے نہیں مِل سکا ہُوں مَیں تم سے
کئی دنوں سے مِرے ساتھ رنگ و بُو بھی نہیں
قمرؔ ! کہاں سے پِلاؤ گے تُم اداسی کو ؟
تمھارے پاس تو ٹوٹا ہُوا سَبُو بھی نہیں
( قمٗٗرؔ ریـاض )