ٹوٹ کر ۔۔۔ حلَق میں ہر تارِنفَس آتا ہے
ایسی حالت ہے کہ اب خود پہ ترَس آتا ہے
آگے دیوار ہے’ دیوار سے آگے دُنیا
کوئی اِس راہ پہ آئے تو عبَث آتا ہے
شوقِ زنجیر زنی یوں بھی ہنر ہے دل کو
خون رِستا ہے تو اِس زخم میں رَس آتا ہے
رت بدلتی ہے نئی آب و ہوا کی خاطر
باغ میں کوئی گلِ تازہ نفَس آتا ہے
روح آزاد نہیں ہوتی کسی صورت بھی
جسم کے بعد کوئی اور قفَس آتا ہے
عکس چُھپ جاتے ہیں تاریکیِ شب میں جا کر
صبح دَم آئنہ خانے پہ ترس آتا ہے
میں جسے پالتا ہوں عرصۃ حکمت میں ‘ وہ سانپ
وقت آنے پہ کسی اور کو ڈس آتا ہے
میری آنکھوں میں ابھی کوچ کا منظر ہے وہی
میرے کانوں میں ابھی شورِ جــرَس آتا ہے
پیاسا رہ جاتا ہے ہر بار یہ صحرا ‘ آزرؔ !
اور وہ اَبر سَــمُندر پہ برس آتا ہے
( دلاور علی آزرؔ )