پھول کی رُت ‘ نہ بہاروں کا گذر میرے بعد
تھم کے رہ جائے گا موسِـم کا سفر میرے بعد
جس طرف دیکھیے’ پَت جھڑ کے نظارے ہوں گے
تکتے رہ جائیں گے سایوں کو شجر ‘ میرے بعد
کلیاں کِھلنے کی ادائیں بھی بِسر جائیں گی
بھول جائیں گے مہَکنا گُلِ تر ‘ میرے بعد
دل کے کہساروں پہ لگ جائیں گے شب کے ڈیرے
وادیِ جاں میں نہ اُترے گی سحَر میرے بعد
اَبر سے قطرہء نیساں بھی نہیں ٹپکے گا
سـیپیاں بھی نہ بنائیں گی گہَـر میرے بعد
کیوں نہیں آیا وہ اک شاعرِ آوارہ مزاج
تجھ سے پوچھے گی ترے گھر کی ڈَگر ‘ میرے بعد
اے مَحبّت! ترا ہر ناز اُٹھایا میں نے
کون اٹھائے گا ترے ناز ؟ مگر میرے بعد
فن لِپٹ کر مِری چوکھٹ سے بہت روئے گا
آنکھیں غزلوں کی بھی ہو جائیں گی تر ‘ میرے بعد
میرے دیوان کو سینے سے لگا رکھّیں گے
اہلِ فن، اہلِ زباں، اہلِ ہُنر ۔۔۔ میرے بعد
تبصرے کرتے رہیں گے مِرے لہجے پہ ‘ خُمارؔ !
محفلِ شعر میں اربابِ نظر ۔۔۔ میرے بعد
( سُلیـمــان خُمـــارؔ )