آخری گُفت گُو ۔۔۔ الوداع
اب نہیں مجھ میں تُو ۔۔۔ الوداع
کُنج ِ خلوت میں خوش آمدِید
دہر کے رُو بَہ رُو ۔۔ الوداع
مجھ رفو گر سے مت چھین دل
ہو چکا جو رفُـو ۔۔۔ الوداع
ڈوب دیکھا تری موج میں
تو ہے خشک آب جُو ۔۔۔ الوداع
میں ہُوں زرخیز رُت کا نصیب
موجۃ بے نمُـــو ! الوداع
ایک دوست آ رہا ہے قریب
اے فراق ‘ اے عدُو !! الوداع
آخرت بھی تو ہے اک خُمار
توڑتا ہُوں ســبُو ۔۔۔ الوداع
میں جہاں تھا ‘ وہیں ہوں ابھی
اور تِری آرزو ۔۔۔ الوداع
مرگ آثار سـانسیں ‘ ظفــرؔ !
اک صدا چـــار سُو ۔۔۔ الوداع
( صــابِـر ظفـــرؔ )