حالت ِ حال کی افسوس سِــتم رانی میں
میں پکاروں بھی کسے دشت کی ویرانی میں
پانو اُن کے کبھی آسودہء منزل نہ ہوئے
کٹ گئے راہ سے جو عقل کی جولانی میں
لٹ گئی کس سے کہیں ہائے متاعِ احساس
دولتِ دل تھی! گئی! شوقِ جہاں بانی میں
میں ترا قرض اتاروں مجھے توفیق تو دے
مضطرب سجدے ہیں یارب ! مِری پیشانی میں
اب وہ آنکھوں میں چمک ہے’ نہ کسی دل میں خلوص
رونقیں ساری گئیں ۔۔۔ سِــکّوں کی تابانی میں
( محمّـــــد عـلـی ســاحِــلؔ )