__________________
مصنف : ناظم حکمت
مترجم : منو بھائی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ترک شاعر و مصنف ناظم حکمت کے بارے میں منو بھائی لکھتے ہیں
“ناظم حکمت کی شاعری تلمیہات اور استعاروں ،لفاظی اور زبان دانی کے کمالات میں لپٹی ہوئی باتیں نہیں کرتی بلکہ صاف سیدھی،عام فہم اور لوگوں کی سمجھ میں آجانے والی زبان استعمال کرتی ہے۔ ان کی زبان کے معانی اور مطلب بیان کرنے والی لغت کی کتابوں اور تشریح کرنے والے خلاصوں کی ضرورت بھی لاحق نہیں ہوئی اور یہی ناظم حکمت اور ان کی انقلابی شاعری کا کمال ہے۔ ”
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ناظم حکمت کے منظوم ناول کے اردو ترجمہ سے لیا گیا اقتباس
۔
ناظم حکمت کے منظوم ناول کا ایک کردار
ترکی کے عظیم شاعر ناظم حکمت اپنے منظوم ناول’’انسانی منظر نامہ‘‘کے پہلے باب کی ابتداء میں ایک کردار مستری غالب کا تعارف ان الفاظ میں کراتے ہیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سیڑھیوں پر شخص مستری غالب تھا جو
عجیب و غریب باتیں سوچنے کے لئے مشہور تھا
’’اگر میں میٹھے بسکٹ کھا سکوں ہر روز‘‘
اس نے سوچا جب وہ پانچ سال کا تھا۔
’’اگر میں سکول جاسکوں‘‘ اس نے سوچا جب وہ دس سال کا تھا
’’کاش میں اپنے باپ کی چاقوئوں کی دوکان
شام کی نماز سے پہلے چھوڑ سکوں‘‘
جب وہ گیارہ سال کا تھا اس نے سوچا
’’کاش میں پیلے رنگ کے جوتے پہن سکوں
جو لڑکیاں غور سے دیکھیں‘‘جب وہ پندرہ سال کا تھا اس نے سوچا
’’میرے باپ نے چاقوئوں کی دکان کیوں بند کردی،
فیکٹر ی باپ کی دکان جیسی نہیں‘‘
اس نے سوچاجب وہ سولہ سال کا تھا۔
’’کیا میری تنخواہ بڑھے گی، اس نے سوچا بیس سال کی عمر میں
’’بابا پچاس سال کی عمر میں مرگئے
کیا میں بھی جلدی مرجائوں گا؟ اس نے سوچا جب وہ اکیس سال کا تھا
’’اگر میں نوکری سے نکال دیا گیا‘‘
اس نے سوچا بائیسویں سال میں
’’اگرمیں نوکری سے نکال دیا گیا؟‘‘ اس نے سوچا چوبیسویں سال میں
اور وہ بار بار نوکری سے نکالا جاتا رہا
اس نے سوچا’’اگر میں بے روزگار ہوگیا تو؟‘‘
اکاون سال کی عمر میں اس نے سوچا‘‘ میں بوڑھاہوگیا ہوں
اپنے باپ سے عمر میں ایک سال بڑا
اب وہ باون سال کا تھا اور بے روزگار تھا
سیڑھیوں پر رک گیا
وہ کھوگیا عجیب و غریب خیالات میں
میں کب مروں گا؟
کیا میرے مرنے کے لئے چارپائی ہوگی؟‘‘
اس نے سوچا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
https://jang.com.pk/print/17214-todays-print-news
۔
بشکریہ
ناظم حکمت : انسانی منظر نامہ __________________مصنف : ناظم حکمت مترجم : منو بھائی ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔…
Posted by Irum Iqbal Naqvi on Saturday, January 13, 2018