کام آیا مِرے خوب ، تہہِ آب کو چُھونا
مِلتا ہے کسے، گوہرِ نایاب کو چُھونا ؟
بڑھتی ہے طلب عشق میں’ دیدار ہو جتنا
کرتا ہے فزوں پیاس یہاں ، آب کو چُھونا
لاتی ہے مجھے وَجد میں’ افلاک کی گردش
لاتا ہے مجھے رقص میں ‘ گرداب کو چُھونا
اسباب میسّر تھے مجھے سارے جہاں کے
خواہش میں کہاں تھا مگر اسباب کو چُھونا
سپنوں کی دعا دینا ۔۔۔۔ مِری آنکھ کو ہم دم !
نرمی سے ۔۔۔ ذرا دیدہِء بے خواب کو چُھونا
کیا چیز تڑپ ہے’ دلِ مضطر سے نہ پوچھو
جانو گے ‘ کبھی پارہ ء بے تاب کو چُھونا
اک لَمس ترا ‘ زندگی پھونکے مِرے تن میں
چُھونا ‘ ذرا ۔۔۔۔۔ اِس ماہیء بے آب کو چُھونا
شب ہوتے ہی بن جاتی ہوں میں نور کا منبع
راس آ گیا مجھ کو ‘ کسی مَہ تاب کو چُھونا
نسرین! مِلا جب سے ۔۔ وہ اک لَمسِ ملائم
بھاتا ہی نہیں ‘ اطلس و کم خواب کو چُھونا
( نسرین سیِّد )