٭ آج آ بیٹھا ہوں ماضی کے مزاروں کے قریب
اَور کچھ دیر ٹھہَـر جانے کو جی چاہتا ہے
پھر سے سبزے پہ اُتر آئی ہے اَپریل کی دُھوپ
اَور اِس دُھوپ میں سَســتانے کو جی چاہتا ہے
بازُوؤں میں مِرے پھر مَچھلیاں جی اُٹّھی ہیں
جیسے ممکِن ہو ‘ تجھے پانے کو جی چاہتا ہے
اپنی شہ زادگی مانع ہے فُغاں سے ‘ ورنہ
حال ایسا ہے کہ بتلانے کو جی چاہتا ہے
تُو نے سَونے کو اُتارا ہے کہ پیتل پہنے
میرے ناداں ! تجھے سمجھانے کو جی چاہتا ہے
وضع کا پاس بھی لازِم ہے ‘ مگر کیا کیجے
چَوٹ ایسی ہے کہ سہلانے کو جی چاہتا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
٭ نا تمام
( ســعــیــد صــاحِبؔ )