مِرے اندر کی ویرانی نے مجھ کو مار ڈالا
کہ وَحشت کی فراوا نی نے مجھ کو مار ڈالا
کہاں ہے نقطہء ختمِ مسافت ‘ کون جانے
مسافت تیری طو لانی نے ۔۔۔ مجھ کو مار ڈالا
نہاں ہیں عکس اندر عکس کتنے آئنوں میں
اِن آئینوں کی حیرانی نے مجھ کو مار ڈالا
نہ راس آیا مجھے صحرا ئے ہستی میں پڑاو !
سرابوں کی فراوانی نے مجھ کو مار ڈالا
پِلائیں گے مجھے کیا زہر پیالہ ۔۔۔ دوست میرے
مِرے طرزِ سخُن دانی نے مجھ کو مار ڈالا
کہاں سایہ ؟ میسّر ہے بیاباں کی کڑی دھوپ
تمازت کی اِس اَرزانی نے مجھ کو مار ڈالا
مسافت میں میسّر ہی نہیں مہلت رفو کی
سو ‘ اِن زخموں کی عریانی نے مجھ کو مار ڈالا
مذاقِ کرب کی معراج پا کر لمحہ لمحہ
جنوں کی حشر سامانی نے مجھ کو مار ڈالا
جمی ہے تَشــنگی صدیوں کی ہونٹوں پر ابھی تک
فراتِ جبر کے پانی نے مجھ کو مار ڈالا
کہاں تک آنکھ دیکھے ایک جیسے بانجھ منظر
مِرے خوابوں کی ویرانی نے مجھ کو مار ڈالا
( پــرویــن ؔ حیــــدر )