جیسے ہم لِکھتے ہیں ‘ یُوں کوئی نہیں لِکّھے گا
وَحشتِ قلبِ تپاں کیسے لکھی جائے گی !
حالتِ سُوزِ دَرُوں ‘ کوئی نہیں لِکّھے گا
کیسے ڈھیہ جاتا ہے دل ‘ بُجھتی ہیں آنکھیں کیسے؟؟
سَــر نوِشتِ رگِ خُوں ‘ کوئی نہیں لِکّھے گا
کوئی لِکّھے گا نہیں ۔۔۔۔ کیوں بڑھی ‘ کیسے بڑھی بات ؟؟
کیوں ہُوا درد فــزُوں ؟ کوئی نہیں لِکّھے گا
خلقتِ شہر سَــر آنکھوں پہ بِٹھاتی تھی جنہیں
کیوں ہُوئے خوار و زبُوں ؟ کوئی نہیں لِکّھے گا
عرضیاں ساری نظر میں ہیں رَجَـــز خوانوں کی
سب خبر ہے ہمیں ‘ کیُوں کوئی نہیں لِکّھے گا
شہر آشُوب کے لکھنے کو جگر چاہیے ہے
مَیں ہی لِکُّھوں تو لکُھوں ‘ کوئی نہیں لِکّھے گا !
بے اثر ہوتے ہُوئے حرف کے اِس موسِـــم میں
کیا کہُوں ‘ کس سے کہُوں ؟؟ کوئی نہیں لِکّھے گا
( اِفتــخــــارؔ عــارِفــــــــ )