علامّہ محمد اقبالؔ
اصغرؔ حسین گونڈوی
عدیمؔ ہاشمی
۔۔۔۔۔
علامہ اقبال
نالہ ہے بُلبُلِ شوریدہ تِرا خام ابھی
اپنے سینے میں اِسے اور ذرا تھام ابھی
پُختہ ہوتی ہے، اگر مصلحت اندیش ہو عقل
عِشق ہو مصلحت اندیش، تو ہے خام ابھی
بے خطر کود پڑا آتشِ نمرُدو میں عِشق
عقل ہے محوِ تماشائے لبِ بام ابھی
عِشق فرمُودہء قاصد سے سُبک گام عمل
عقل سمجھی ہی نہیں معنٰیِ پیغام ابھی
شیوہء عِشق ہے آزادی و دَہر آشوبی
تُو ہے زُنّاریِ بُت خانہء ایام ابھی
عُذرِ پرہیز پہ کہتا ہے بِگڑ کر ساقی
ہے تِرے دِل میں وہی کاوِشِ انجام ابھی
سعیِ پیہم ہے ترازُوئے کم و کیف حیات
تیری میزاں ہے شُمارِ سَحر و شام ابھی
ابرِ نیساں یہ تُنُّک بخشیِ شبنم کب تک
مِرے کُہسار کے لالے ہیں تہی جام ابھی
بادہ گردانِ عجم وہ، عربی میری شراب
مِرے ساغر سے جِھجکتے ہیں مئے آشام ابھی
خبر اقبالؔؒ کی لائی ہے گُلِستاں سے نسیم
نَو گرفتار پھڑکتا ہے تہء دام ابھی۔۔۔!
۔۔۔۔۔
اصغرؔ گونڈوی
یُوں نہ مایُوس ہو اے شورشِ ناکام ابھی
میری رگ رگ میں ہے اِک آتشِ بے نام ابھی
عاشقی کیا ہے ہر اِک چیز سے تہی ہوجانا
اُس سے مِلنے کی ہے دِل میں ہوَسِ خام ابھی
اِنتِہا کیف کی اُفتادگی و پستی ہے
مُجھ سے کہتا تھا یہی دُردِ تہۂ جام ابھی
عِلم و حِکمت کی تمنّا ہے نہ کونین کا غم
میرے شیشے میں ہے باقی مئے گُلفام ابھی
سب مزے کر دیے خورشیدِ قیامت نے خراب
میری آنکھوں میں تھا اِک رُوۓ دِلآرام ابھی
بُلبُلِ زار سے گو صحنِ چمن چُھوٹ گیا
اُس کے سینے میں ہے اِک شعلۂ گُلفام ابھی۔۔۔!
۔۔۔۔۔
عدیمؔ ہاشمی
زِندگی پاؤں نہ دھر جانبِ انجام ابھی
مِرے ذمّے ہیں ادھُورے سے کئی کام ابھی
ابھی تازہ ہے بہت گھاؤ بِچھڑ جانے کا
گھیر لیتی ہے تِری یاد سرِ شام ابھی
اِک نظر اور اِدھر دیکھ مسیحا میرے
تِرے بیمار کو آیا نہیں آرام ابھی
رات آئی ہے تو کیا تُم تو نہیں آئے ہو
مِری قِسمت میں کہاں لِکھا ہے آرام ابھی
جان دینے میں کرُوں دیر یہ مُمکِن ہے کہاں
مُجھ تک آیا ہے مِری جاں تِرا پیغام ابھی
طائرِ دِل کے ذرا پر تو نِکل لینے دو
اِس پرندے کو بھی آنا ہے تہء دام ابھی
توڑ سکتا ہے مِرا دِل یہ زمانہ کیسے
میرے سینے میں دھڑکتا ہے تِرا نام ابھی
میرے ہاتھوں میں ہے موجُود تِرے ہاتھ کا لمس
دِل میں برپا ہے اُسی شام کا کُہرام ابھی
مَیں تِرا حُسن سُخن میں ابھی ڈھالُوں کیسے
میرے اشعار بنے ہیں کہاں اِلہام ابھی
مِری نظریں کریں کیسے تِرے چہرے کا طواف
مِری آنکھوں نے تو باندھے نہیں اِحرام ابھی
یاد کے ابر سے آنکھیں مِری بھیگی ہیں عدیمؔ
اِک دھُندلکا سا ہے بھیگی تو نہیں شام ابھی۔۔۔!
[ad_2]