نازنیں ! اَجنبی شہرِ محبت میں ھُوں
میں تیرے دیس کے اطوار سے ناواقف ھُوں
دیدۂ شوق کی بیباک نگاھوں پہ نہ جا
کیا کروں جراتِ گفتار سے ناواقف ھُوں
چل پڑا ھُوں تیرے دامن کو پکڑ کر ، لیکن
اِس کٹھن جادۂ پُرخار سے ناواقف ھُوں
مست ھوں عشرت ِآغاز کی سرمستی میں
میں ابھی عاقبت کار سے ناواقف ھُوں
سُونگھنی ھے تیری زُلفوں سے ابھی بُوئے جُنوں
ابھی دامن کے پھٹے تار سے ناواقف ھُوں
دیکھ لوں تجھ کو تو بے ساختہ پیار آتا ھے
پیار آتا ھے ، مگر پیار سے ناواقف ھُوں۔
دل میں یہ جذبۂ بیدار ھے کیا ؟ تُو ھی بتا
میں تو اس جذبۂ بیدار سے ناواقف ھُوں
اک مسافر ھوں تیرے دیس میں آ نکلا ھُوں
اور تیرے دیس کے اطوار سے ناواقف ھُوں
”مجید امجد“
بشکریہ
https://www.facebook.com/Inside.the.coffee.house