فیض احمد فیضؔ
شفیق خلشؔ
۔۔۔۔۔
فیضؔ
نَہِیں نِگاہ میں مَنزِل تو جُستَجُو ہی سہی
نَہِیں وِصال مُیَسَّر تو آرزُو ہی سہی
نَہ تَن میں خُون فَراہَم نہ اَشک آنکھوں میں
نَمازِ شَوق تو واجب ھے بے وُضُو ہی سہی
کِسی طرح تو جمے بَزم میکدے والو
نَہِیں جو بادہ و ساغر تو ہاؤ ھُو ہی سہی
گر اِنتِظار کٹھن ھے تو جب تَلَک اے دِل
کِسی کے وَعدَہء فَردا کی گُفتَگُو ہی سہی
دیارِ غیر میں مَحرَم اگر نَہِیں کوئی
تو فیضؔ ذِکرِ وَطن اَپنے رُوبَرُو ہی سہی۔۔۔!
۔۔۔۔۔
خلشؔ
چَراغِ دِل تو ھو روشن رَسَدِ لہُو ہی سہی
”نہیں وِصال مُیَسَّر تو آرزُو ہی سہی“
کوئ تو کام ھو ایسا زِندَگی ھو حَسِیں
نَہِیں جو پیار مُقَدَّر تو جُستَجُو ہی سہی
یہی خیال لیے ھم چَمَن میں جاتے ہیں
وہ گُل مِلے نہ مِلے اُس کے رَنگ و بُو ہی سہی
عَجِیب بات ھے حاصِل فِراق ھے نہ وِصال
جو تیرے دَر پہ پَڑے ہیں سُرخرُو ہی سہی
ھم اُس کے طَرزِ عَمَل سے ھُوۓ نہ یُوں عاجِز
کہ جانِ جاں تو ھے اپنا وہ تُندخُو ہی سہی
خَلِشؔ یہ دِل نہ ھو مائل کِسی بھی مَہوش پر
مُشابَہَت میں ھو اُس کی وہ ھُو بَہ ھُو ہی سہی۔۔۔!
[ad_2]