مرزا غالبؔ دہلوی
راغبؔ مرادآبادی
۔۔۔۔۔
غالبؔ
کِس کا جُنُونِ دید تمنّا شکار تھا
آئینہ خانہ وادیِ جوہر غُبار تھا
کِس کا خیال آئینۂ اِنتِظار تھا
ہر برگِ گُل کے پردے میں دِل بے قرار تھا
ایک ایک قطرے کا مُجھے دینا پڑا حِساب
خُونِ جِگر وَدِیعَتِ مِژگانِ یار تھا
اب مَیں ہُوں اور ماتمِ یک شہرِ آرزُو
توڑا جو تُو نے آئینہ تِمثال دار تھا
گلیوں میں مِری نَعش کو کھینچے پِھرو کہ مَیں
جاں دادۂ ہَوائے سرِ رہگزار تھا
موجِ سرابِ دشتِ وفا کا نہ پُوچھ حال
ہر ذرّہ مِثلِ جوہرِ تیغ، آب دار تھا
کم جانتے تھے ہم بھی غمِ عِشق کو پر اب
دیکھا تو کم ہُوئے پہ غمِ روزگار تھا۔۔۔!
۔۔۔۔۔
راغبؔ
ہر ذرّہ جِس کا خُلدِ بریں درکنار تھا
یادَش بَخیر شاۂ اُممۖ کا دیار تھا
دَربارِ مُجتبیٰۖ میں کہاں دُھوپ کی تپِش
دُر بار ابرِ رحمتِ پَرْوَردِگار تھا
جنّت میں لائ مُجھ کو شَفاعَت حُضُورۖ کی
اعمال پر نِجات کا کب اِنْحِصار تھا
راۂ نِجات اُنۖ کا کرم ہے خُدا گواہ
ورنہ مِرا عمل تو زرِ کم عیار تھا
وہ بھی رہا عطا سے نہ مَحْرُوم آپۖ کی
جِس دوشِ ناتواں پہ گُناہوں کا بار تھا
اِک اِک سیاہ کار، سرِ حَشْر، ہر نَفَس
لُطْفِ شۂ انامۖ کا اُمِیدوار تھا۔۔۔!
[ad_2]