پُر خطر ہے راہ میری’ اے صنم ! من دِیگرم
ساتھ کیا دیں گے ترے نازُک قدم ‘ من دیگرم
کیوں مَیں سَرگرداں رہوں آفاق کی تسخیر میں
جب کہ خود ہیں وہ مِری چوکھٹ پہ خَم ‘ من دیگرم
ہر ادا میں میری مضمِر ہیں کئی رازِ حیات
جانتا ہوں رمزِ موجود و عدم ‘ من دیگرم
برہَمن اُور شیخ مجھ کو دے نہ پائیں گے فریب
خوب جانوں مسلکِ دیر و حرم ‘ من دیگرم
مے کدہ حکمت کا کُھلتا ہے مِرے کمرے میں روز
بانٹتا ہے آگہی خود جامِ جم ‘ من دیگرم
راہ گُم کرنے کا مجھ کو کوئی اندیشہ نہیں
جانتا ہوں ہر ڈَگر کے پیچ و خم ‘ من دیگرم
عزم کر لیتا ہوں جب بھی کارِ نا ممکن کا مَیں
آسماں رکھ لیتا ہے میرا بھرم ‘ من دیگرم
کیا پریشاں کر سکے گی مجھ کو دُنیاے دُنی
کیا ستائیں گے مجھے رنج و الم ‘ من دیگرم
میری آنکھوں سے کبھی آنسو ٹپکتے ہی نہیں
ہے الگ اوروں سے میری چشمِ نم’ من دیگرم
جب بھی آتا ہے بھٹک کر میرے حُجرے کے قریں
کیف میں تبدیل ہو جاتا ہے غم ‘ من دیگرم
طرزِ نَو میں کل کتابِ وقت میں ہو گی خُمـــارؔ !
ہر ورَق پر داستاں میری رقم’ من دیگرم
( سُلیمـــاں خمـــارؔ )