کتاب ۔ کلیاتِ امیر مینائی
ردیف ‘ الف ۔ صفحہ ۸۹
بندہ نوازیوں پہ خداےٓ کریم تھا
کرتا نہ میں گنہ تو گناہِ عظیم تھا
باتیں بھی کہیں خدا نے دکھایا جمال بھی
اللہ کیا نصیب جنابِ کلیم تھا
کیوں تیغ ناز بھول گئی مجھ کو وقتِ قتل
میں بھی تو اک نیاز گزارِ قدیم تھا
مانگا جو میرے دل کو درگوش یار نے
دیتے ہی بن پڑا کہ سوالِ یتیم تھا
کیا رنگ اس کے جاتے ہی گھر کا بدل گیا
دوزخ ہے آج کل جو ریاضِ نعیم تھا
ہم سے جو وہ کھینچا یہ گلے سے لپٹ گیا
قاتل سے بڑھ کے خنجر قاتل کریم تھا
کیا کیا نہ آفتوں کے رہے ہم کو سامنے
یا رب شباب تھا کہ بلاےٓ عظیم تھا
بیٹھا جہاں فقیر وہاں فرش ہو گیا
سایہ مرا لیے ہوےٓ میری گلیم تھا
دنیا میں کچھ قیام نہ سمجھو کرو خیال
اس گھر میں تم سے پہلے بھی کوئی مقیم تھا
اب کون ہے جو منزلِ الفت میں ساتھ دے
دل بھی چھٹا رفیق جو اپنا قدیم تھا
پہنچے تو ہم بھی جلوہ گہ یار میں مگر
دو اک قدم بڑھا ہوا پاےٓ کلیم تھا
لاتی کبھی ہمارے قفس تک بھی بوےٓ گل
ٹوٹا ہوا نہ پاوٓں ترا اے نسیم تھا
ہوتا نصیب مر کے ہمیں نقد عیش کیا
زیر زمیں بھی دور سپہر لیئم تھا
کیا چاہتا میں فیض کہ انجم سے آسماں
اک تودہٓ بلند عظام رمیم تھا
جس دن تھا میں چمن میں ہوا خواہِ گل امیؔر
نام صبا کہیں نہ نشانِ نسیم تھا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔””””””””
[ad_2]