نشیبِ حلقہ ء صحنِ گماں سے دُور نہیں
کہیں بھی ہو وہ ستارہ ‘ یہاں سے دُور نہیں
حدِ سپیہر و بیاباں میں جاگتی ہُوئی لَو
جو ہم سے دُور ہے ‘ آیندگاں سے دُور نہیں
گذرنے والی ہے گلیوں سے بادِ برگ آثار
کہ اب وہ صبح مِری داستاں سے دُور نہیں
اُسی کے حرفِ نہ گُفتہ سے گُونجتے دَر و بام
جو دُور رہ کے بھی پہناے جاں سے دُور نہیں
سحابِ سبزہ و نم ناک سے گذرتی ہوئی
یہ شام چشمہ ء ریگ ِ رَواں سے دُور نہیں
مَیں اپنے حُجرہ ء تاریک تر میں رہ کر بھی
سرِشتِ حلقہ ء آوارگاں سے دُور نہیں
مگر وہ شاخِ تَہی رنگ و بستہ ء دیوار
جو گُل سِتاں سے الگ ہے ‘ خزاں سے دُور نہیں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
خاک سے چشمہ ء صد رنگ اُبلتے دیکھا
مَیں نے اُس شوخ کو پوشاک بدلتے دیکھا
آتشِ رنگ سے دہکی ہوئی شہزادی کو
ہاتھ میں پھول لئے ‘ نیند میں چلتے دیکھا
آگ ہی آگ ہے سیّارے پہ لیکِن ‘ ہم نے
شاخِ زیتُون ! تجھے پُھولتے پَھلتے دیکھا
تھی مؤذّن کی نِدا ‘ نیند سے بہتر ہے نماز
میں نے پتّھر کو مناجات میں ڈھلتے دیکھا
جانیے ۔۔ کون سی مٹّی سے بنے ہیں ‘ ثروتؔ !
ہم نے عُشّاق کو دریاؤں پہ چلتے دیکھا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
مِرے قریب اگر بولیے تو آہستہ
تصوُّرات کے آئینے ٹوٹ جاتے ہیں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
بہا کے لے گئی جانے کہاں ندی اُس کو
وہ ایک پات جو لہروں کے درمیان گِرا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔