آٹھواں بَر اگر وہ ٹُھکراتی
پھر سہاگن کبھی نہ بن پاتی
” قیس ایوارڈ ” خود کو دِلوایا
کی مَحبّت مگر علاماتی
عَقدِ مشتاقِ یوسفی کے وقت
رو رہے تھے تمام باراتی
مہتمِم نے زکاۃ لے کے کہا :
یہ ادارہ نہیں ہے خیراتی
چینلوں کو فری میں مِل گئی ہے
جاہلوں کی جدید سُقراتی
دودھ کے ٹَب میں گھول کر بوڈر !
شہر میں گُھس چکے ہیں دیہاتی
کیوں مِلا جائے عام لوگوں سے
جب بشیراں نہ ہو ملاقاتی
قلّتِ شعر کا سبب ٹھہری
شہر میں شاعروں کی بہتاتی
دشتِ مجنوں ہے شہر میں شامل
یہ علاقہ نہیں مضافاتی
جوں ہی آتے ہیں ساونی بادل
مانگتا ہے وہ مجھ سے برساتی
٭ وہ وہاں ہے جہاں سے اُس کو بھی
اپنی خامی نظر نہیں آتی
جس قدَر فِلم بِین روئے ہیں
اِس قدَر سِــین تھا نہ جذباتی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
٭تحریفِ شعرِ غالبؔ
( عــزیــز فیــصــلؔ )